ಭವಿಷ್ಯದಲ್ಲಿ ಮಾನವ ಸಂಪನ್ಮೂಲ ವೃತ್ತಿ ಮತ್ತು ವೃತ್ತಿನಿರತರಿಗೆ ಬೇಕಾದ ಕೌಶಲ್ಯಗಳು

ಗೋವಿಂದರಾಜು ಎನ್.ಎಸ್.
ಪ್ರಧಾನ ವ್ಯವಸ್ಥಾಪಕರು - ಮಾನವ ಸಂಪನ್ಮೂಲ ಹಾಗೂ ಲೇಖಕರು
ಮೆ. ಕರ್ನ್ ಲೀಬರ್ಸ್ (ಇಂಡಿಯ) ಪ್ರೈ.ಲಿ., ತುಮಕೂರು

ಆರ್ಥಿಕತೆ ಮತ್ತು ಸಮಾಜ ನಿರಂತರ ಬದಲಾವಣೆಯ ಪಥದಲ್ಲಿ ಸಾಗುತ್ತಿದೆ. ಇದರ ಜೊತೆಯಲ್ಲಿ ಮಾನವ ಸಂಪನ್ಮೂಲ ವೃತ್ತಿ ಕೇವಲ ಕೆಲಸದ ಅವಧಿಯ ಲೆಕ್ಕಾಚಾರ ಮತ್ತು ಸಂಬಳ ನೀಡುವ (Time office and payroll function) ಕೆಲಸದಿಂದ ವ್ಯವಹಾರದ ಅವಿಭಾಜ್ಯ ಅಂಗವಾಗಿ ಪಾಲುದಾರನಂತೆ ಬೆಳೆದು ನಿಂತಿದೆ (Strategic Partner). ಹಾಗಾದರೆ ಮುಂದೇನು? ಈ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳಬೇಕಾದರೆ ವ್ಯವಹಾರದಲ್ಲಿ ಆಗುತ್ತಿರುವ ಬದಲಾವಣೆಗಳ ಅವಲೋಕನ ಅತ್ಯಗತ್ಯ. ಮಾನವ       ಸಂಪನ್ಮೂಲ ವೃತ್ತಿ ವ್ಯವಹಾರದ ಬದಲಾವಣೆಗಳಿಗೆ ಹೊಂದಾಣಿಕೆ ಮಾಡಿಕೊಂಡು ತನ್ನದೇ ಆದ ಅಸ್ತಿತ್ವವನ್ನು ಉಳಿಸಿಕೊಳ್ಳದೇ ಹೋದರೆ ಈ ವೃತ್ತಿಯ ಭವಿಷ್ಯ ಅತಂತ್ರವಾಗಬಹುದು. ವ್ಯವಹಾರ ಮತ್ತು ಅದರ ಸ್ವರೂಪಗಳಲ್ಲಿ ಅದರಲ್ಲಿಯೂ ಮಾನವ ಸಂಪನ್ಮೂಲ / ಕೆಲಸಗಾರರ ಪ್ರವೃತ್ತಿಯಲ್ಲಿ ಸಾಕಷ್ಟು ಬದಲಾವಣೆಗಳು ಕಂಡುಬರುತ್ತಿವೆ. ಅವುಗಳನ್ನು ಸಂಕ್ಷಿಪ್ತವಾಗಿ ಈ ಕೆಳಗಿನಂತೆ ವಿವರಿಸಬಹುದು.

ತಾಂತ್ರಿಕತೆ ವ್ಯವಹಾರದ ಅವಿಭಾಜ್ಯ ಅಂಗವಾಗಿ ಬೆಳೆಯುತ್ತಾ ಹೋಗುತ್ತದೆ. ಎಲ್ಲ ಉತ್ಪಾದನೆ ಮತ್ತು ಇತರ ಪ್ರಕ್ರಿಯೆಗಳಲ್ಲಿ ತಾಂತ್ರಿಕತೆ ಮತ್ತು ಯಾಂತ್ರಿಕ ಜ್ಞಾನ ಹಾಗೂ ಕೃತಕ ಬುದ್ದಿಮತ್ತೆಯ (Artificial Intelligence) ಬಳಕೆ ಮಾಮೂಲಾಗಿ ಬಿಡುತ್ತದೆ. ಈಗಾಗಲೇ ನಾವು ಇಂಡಸ್ಟ್ರಿ 4.0 ಎಂದೆಲ್ಲ ಕೇಳುತ್ತಿದ್ದೇವೆ. ಮುಂದೆ ಇದು 4.1 ರ ಸರಣಿ ಅಥವಾ 5.0 ಎಂದೆಲ್ಲ ಹೇಳಿಸಿಕೊಂಡು ಸಾಕಷ್ಟು ಬದಲಾವಣೆಗಳಿಗೆ ನಾಂದಿ ಮಾಡಿಕೊಡಬಹುದು. ಮನುಷ್ಯರೇ ಇಲ್ಲದ ಹಾಗೂ ರೋಬೋಟ್ಗಳು ಉತ್ಪಾದನೆಯಲ್ಲಿ ನಿರತವಾಗಿರುವ ಉತ್ಪಾದನಾ ಕೇಂದ್ರಗಳು ಮತ್ತಷ್ಟು ಹೆಚ್ಚಾಗಬಹುದು.

• ವ್ಯವಹಾರದ ಗುಟ್ಟು ರಟ್ಟಾಗದೆ ಮತ್ತಷ್ಟು ಸಂಕೀರ್ಣತೆ, ದ್ವಂದ್ವ, ಅಸ್ತಿರತೆ, ಸುಲಭವಾಗಿ ಊಹಿಸಲು ಸಾಧ್ಯವಾಗದ ಕಡೆಗೆ ಪಯಣಿಸುತ್ತಿದೆ. ಇದನ್ನೇ ಇಂಗ್ಲೀಷಿನಲ್ಲಿ ಕೆಲವು ಸೈದ್ದಾಂತಿಕರು, ಪರಿಣಿತರು VUCA  ಎಂದು ಕರೆದಿದ್ದಾರೆ.
• ಯಾವೊಂದು ವಿಷಯವನ್ನು ತಿಳಿಯಬೇಕಾದರೆ, ಅಥವ ಹೊಸ ಐಡಿಯ ಬೇಕಾದರೆ, ಹಣಕಾಸು ಬೇಕಾದರೆ ಹೆಚ್ಚಾಗಿ ಕಷ್ಟಪಡುವ ಅವಶ್ಯಕತೆಯಿಲ್ಲ. ಯಾವುದರ ಬಗ್ಗೆ ಬೇಕೆಂದು ಅಂತರ್ಜಾಲದಲ್ಲಿ ಒಂದು ಮಾಹಿತಿಯನ್ನು ಹರಿಯಬಿಟ್ಟರೆ ಸಾಕು ಸಾಕಷ್ಟು ಐಡಿಯಗಳು, ಸಲಹೆಗಳು, ಬಂಡವಾಳ ಹೂಡಿಕೆದಾರರ ಮಾಹಿತಿಗಳು ಎಲ್ಲವೂ ತಂತಾನೆ ಬಂದು ಬೀಳುತ್ತವೆ. ಇದು ಜಾಣ್ಮೆಯ ಮತ್ತು ಸುಲಭದ ಕೆಲಸವಲ್ಲವೆ? ಇಂಗ್ಲೀಷಿನಲ್ಲಿ ಇದನ್ನು ಕ್ರೌಡ್ ಸೋರ್ಸಿಂಗ್ (Crowd Sourcing) ಎಂದು ಕರೆಯುತ್ತಾರೆ. ಈ ರೀತಿ ಕ್ರೋಢೀಕರಿಸುವ ಹಣಕಾಸು ವ್ಯವಸ್ಥೆಗೆ ಕ್ರೌಡ್ ಫಂಡಿಂಗ್ (Crowd Funding) ಎಂದು ಕರೆಯುತ್ತಾರೆ
• ಎಲ್ಲ ಕೆಲಸಗಳು ಮತ್ತು ಮಾಹಿತಿಗಳು ಡಿಜಿಟಲ್ ತಂತ್ರಜ್ಞಾನದ ನೆರವಿನಿಂದ ಗಣಕೀಕೃತವಾಗುತ್ತಾ (Digitalisation) ಹೋಗುತ್ತವೆ. ಈಗಾಗಲೇ ಈ ವಿಚಾರದಲ್ಲಿ ಸಾಕಷ್ಟು ಸಾಧನೆಯನ್ನು ಮಾಡಲಾಗಿದೆ
• ಗ್ರಾಹಕರ ಬಯಕೆಗಳು ಮತ್ತು ಅವರ ಅವಶ್ಯತೆಗಳು ಹಾಗೂ ಪ್ರವೃತ್ತಿಗಳು ನಿರಂತರವಾಗಿ ಬದಲಾಗುವ ಸ್ವರೂಪವನ್ನು ಪಡೆದುಕೊಳ್ಳುತ್ತವೆ.
• ಅದೂ ಅಲ್ಲದೆ ಈಗ ಇರುವ ಎಷ್ಟೋ ಕೆಲಸಗಳು ಮರೆಯಾಗುತ್ತವೆ ಇಲ್ಲವೆ ಕೃತಕ ಬುದ್ದಿಮತ್ತೆಯನ್ನೊಳಗೊಂಡ ರೋಬೋಟ್ಗಳು ಅವುಗಳನ್ನು ತಮ್ಮ ತೆಕ್ಕೆಗೆ ಬಾಚಿಕೊಳ್ಳುತ್ತವೆ. ಹೊಸ ಹೊಸ ಉದ್ಯೋಗಗಳು ಇದರಿಂದ ಸೃಷ್ಟಿಯಾಗಬಹುದು.
• ಇಡೀ ವಿಶ್ವವೇ ಒಂದು ಹಳ್ಳಿಯಂತೆ ಮಾರ್ಪಾಡಾಗುತ್ತಾ ಹೋಗುತ್ತದೆ. ಯಾಕೆಂದರೆ, ಯಾವುದೇ ಸಮಯದಲ್ಲಿ ಪ್ರಪಂಚದ ಯಾವುದೇ ಭಾಗದಲ್ಲಿರುವ ವ್ಯಕ್ತಿಯು ಮತ್ತೊಂದು ಮೂಲೆಯಲ್ಲಿರುವ ವ್ಯಕ್ತಿಯೊಂದಿಗೆ ದೃಶ್ಯಮಾಧ್ಯಮದ ಸಹಾಯದೊಂದಿಗೆ ಪಕ್ಕದಲ್ಲಿ ಕುಳಿತು ಮುಖಾಮುಖಿ ಚರ್ಚೆ ಮಾಡಬಹುದಾಗಿದೆ. ಅದೂ ಅಲ್ಲದೆ, ಮುಂದಿನ ದಿನಗಳಲ್ಲಿ ಕ್ಷಣಮಾತ್ರದಲ್ಲಿ ಪ್ರಪಂಚದ ಯಾವುದೇ ಮೂಲೆಗಾದರೂ ತಲುಪಬಹುದಾದ ತಂತ್ರಜ್ಞಾನ ಬಂದರೆ ಆಶ್ಚರ್ಯವೇನಿಲ್ಲ. ಇದನ್ನು ಬಿಡಿ, ಚೈನಾದ ಡಾಕ್ಟರನೊಬ್ಬ ಘಾನಾದಲ್ಲಿರುವ ರೋಗಿಯೊಬ್ಬನಿಗೆ ರಿಮೋಟ್ ತಂತ್ರಜ್ಞಾನದ ಮೂಲಕ ಶಸ್ತ್ರಚಿಕಿತ್ಸೆ ನಡೆಸಿದ್ದು ಈಗಾಗಲೇ ಇತಿಹಾಸ.

• ಈ ವ್ಯವಸ್ಥೆ ಈಗಾಗಲೇ ಸಾಕಷ್ಟು ವೇಗದಲ್ಲಿ ಬೆಳೆಯುತ್ತಿದೆ. ವ್ಯವಹಾರ ಮತ್ತು ಮಾನವ ಸಂಪನ್ಮೂಲ ಕ್ರೋಡೀಕರಣ ಸಂಸ್ಥೆಗಳು (ಟಿಪಿಎಗಳು) ಈಗಾಗಲೇ ಈ ವ್ಯವಸ್ಥೆಗೆ ಪುಷ್ಟೀಕರಣ ನೀಡುತ್ತಿವೆ. ಓಲಾ, ಉಬರ್, ಜೊಮಾಟೋ, ಸ್ವಿಗ್ಗಿ ಈ ಸಂಸ್ಥೆಗಳು ತಮ್ಮ ಕಂಪನಿಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಕಾರ್ಮಿಕರನ್ನು ನೇಮಿಸಿಕೊಳ್ಳದೆ ದೊಡ್ಡ ಪ್ರಮಾಣದಲ್ಲಿ ವ್ಯವಹಾರವನ್ನು ನಡೆಸುತ್ತಿವೆ. ಈ ಸಂಸ್ಥೆಗೆ ಕೆಲಸ ಮಾಡುವ ಜನರು ಸಂಬಳಕ್ಕೆ ಕೆಲಸ ಮಾಡದೆ ಪಾಲುದಾರರಂತೆ ಪರಿಗಣಿಸಿ ಅವರ ಕೆಲಸದ ಸಮಯ ಮತ್ತು ಸ್ವರೂಪಕ್ಕೆ ತಕ್ಕಂತೆ ಹಣ ಪಡೆಯುವ ಪದ್ದತಿ ಜಾರಿಯಲ್ಲಿದೆ.
• ಇನ್ನು ಮಾನವ ಪೀಳಿಗೆಯಲ್ಲಿನ ಬದಲಾವಣೆಗಳನ್ನು ನೋಡಿದರೆ ಝಡ್ ಜನರೇಷನ್ಗೆ ಸೇರಿದ ಜನರು ಉದ್ಯೋಗಕ್ಕೆ ಸೇರುತ್ತಾರೆ. ತಾಂತ್ರಿಕತೆಯ ಅರಿವು, ಬಳಕೆ ಮತ್ತು ವಿವಿಧ ಆಲೋಚನೆಗಳನ್ನು ಉಳ್ಳ ಈ ಪೀಳಿಗೆಯ ನಿರ್ವಹಣೆ ಕಷ್ಟಕರ ಕೆಲಸವಾಗಬಹುದು. ಸಾಂಪ್ರದಾಯಿಕ ನಿರ್ವಹಣೆ ಕೆಲಸಕ್ಕೆ ಬಾರದೆ ಇರಬಹುದು. ಇಷ್ಟೆಲ್ಲಾ ಬದಲಾವಣೆಗಳು ಮಾನವ ಸಂಪನ್ಮೂಲ ವೃತ್ತಿಯ ಮೇಲೆ ಮಾಡಬಹುದಾದ ಬದಲಾವಣೆಗಳೇನು? ತಂದೊಡ್ಡಬಹುದಾದ ಸವಾಲುಗಳೇನು? ಭವಿಷ್ಯದಲ್ಲಿ ಮಾನವ ಸಂಪನ್ಮೂಲ ವೃತ್ತಿಯ ಸ್ವರೂಪವೇನು? ಇವುಗಳಿಗೆ ಉತ್ತರ ಕಂಡುಕೊಂಡರೆ ವೃತ್ತಿನಿರತರು ಕಲಿತುಕೊಳ್ಳಬಹುದಾದ ಕೌಶಲ್ಯಗಳ ಬಗ್ಗೆ ಮಾತನಾಡಬಹುದು.
• ವ್ಯವಹಾರದಲ್ಲಿ ಆಗುವ ಬದಲಾವಣೆಗಳಿಂದಾಗಿ ಮಾನವ ಸಂಪನ್ಮೂಲ ಕ್ಷೇತ್ರದಲ್ಲಿಯೂ ತಾಂತ್ರಿಕತೆಯ ಬಳಕೆ ಹೆಚ್ಚಾಗುತ್ತಾ ಹೋಗುತ್ತದೆ. ಮುಂದೊಂದು ದಿನ ಪೇಪರ್  ಬಳಕೆಯೇ ಇಲ್ಲದ ವ್ಯವಸ್ಥೆ ಜಾರಿಗೆ ಬರುತ್ತದೆ. ಈಗಾಗಲೇ ಸಾಕಷ್ಟು ಪ್ರಗತಿಯನ್ನು ಈ ನಿಟ್ಟಿನಲ್ಲಿ ಸಾಧಿಸಲಾಗಿದೆ.
• ಪ್ರತಿಭೆಗಳ ನಿರ್ವಹಣೆ ತನ್ನ ಈಗಿನ ಅಸ್ತಿತ್ವವನ್ನು ಕಳೆದುಕೊಳ್ಳುತ್ತದೆ (Talent Management). ಅದರ ಬದಲಾಗಿ ಮಾನವ ಸಂಪನ್ಮೂಲ ವೃತ್ತಿಪರರು ಸಾಮಾಜಿಕ ಸಹಭಾಗಿತ್ವದ (Social Collaboration) ಬಗ್ಗೆ ಹೆಚ್ಚು ಕಾಳಜಿ ವಹಿಸಬೇಕಾಗುತ್ತದೆ.
• ಇನ್ನು ನೌಕರರ ಆಯ್ಕೆ ಪ್ರಕ್ರಿಯೆಯನ್ನು ನೋಡಿದರೆ, ಸಾಮಾಜಿಕ ಜಾಲತಾಣಗಳಲ್ಲಿ ಹುಡುಕುವ ಮತ್ತು ಅಲ್ಲಿಯೇ ಆಯ್ಕೆ ಪ್ರಕ್ರಿಯೆಗಳನ್ನು ಮಾಡಿ ಮುಗಿಸುವ (Screening and Hiring through Social Media) ಪ್ರಕ್ರಿಯೆ ಹೆಚ್ಚುತ್ತದೆ. ಅಲ್ಲದೆ ಆಯ್ಕೆ ಪ್ರಕ್ರಿಯೆಯಲ್ಲಿ ರೋಬೋಟ್ಗಳ ಬಳಕೆ ಹೆಚ್ಚಾಗಬಹುದು. ಅಭ್ಯರ್ಥಿಗಳನ್ನು ಸಂದರ್ಶನ ಮಾಡಲು ಟೆಂಗೈ ರೋಬೋಟ್ 2020 ರ ಒಳಗೆ ಬಳಕೆಗೆ ತರಬಹುದು ಎಂದು ಅಂದಾಜಿಸಲಾಗಿದೆ. ಅಲ್ಲದೆ ಸೋಫಿಯಾ ರೋಬೋಟ್ ಈಗಾಗಲೇ ಪ್ರಚಲಿತದಲ್ಲಿದೆ.
• ಸಾಂಪ್ರದಾಯಿಕ ಸಂಬಳ ತತ್ವಗಳು, ಪ್ರಶಂಸಾ ಪದ್ದತಿಗಳು, ಎಲ್ಲರಿಗೂ ಒಂದೇ ರೀತಿಯ ಸಂಬಳ ಮತ್ತು ಸವಲತ್ತು ನೀತಿಗಳು ಕೆಲಸ ಮಾಡದೇ ಹೋಗಬಹುದು (Conventional Compensation and Reward System). ಪ್ರತಿ ನೌಕರನಿಗೆ ಅನ್ವಯಿಸುವಂತೆ ಬಹುಮಾನ ಮತ್ತು ಪರಿಹಾರ ಪದ್ದತಿಗಳು ಅಗತ್ಯವಾಗಬಹುದು (Customised Individual Reward System).
• ಇನ್ನು ಕಲಿಕೆ ಮತ್ತು ಅಭಿವೃದ್ದಿಯ ಕ್ಷೇತ್ರವನ್ನು ಅವಲೋಕಿಸಿದರೆ (Learning and Development) ಇಂದಿನ ಕ್ಲಾಸ್ ರೂಂ / ತರಗತಿ ಕಲಿಕೆ ತನ್ನ ಅಸ್ತಿತ್ವವನ್ನು ಕಳೆದುಕೊಳ್ಳುತ್ತದೆ. ವಸ್ತುತಃ ಮತ್ತು ನೈಜ ಸಮಯ (Virtual and Real Time Learning) ಕಲಿಕೆ ಅಗತ್ಯವಾಗುತ್ತದೆ. ವ್ಯವಹಾರದಲ್ಲಿನ ಬದಲಾವಣೆಗಳಿಂದಾಗಿ ಕಲಿಕೆ, ಅಕಲಿಕೆ (ಮರೆಯುವುದು), ಮರುಕಲಿಕೆಯ (Learning, Unlearning and Relearning) ಪ್ರಕ್ರಿಯೆಗಳ ವೇಗದ ತೀವ್ರತೆ ಹೆಚ್ಚಾಗುತ್ತದೆ. ಕಲಿಕೆಯು ಒಂದು ಅಗತ್ಯವಾಗಿ ಉಳಿಯದೆ ನೌಕರರು ಬಯಸುವ ಸವಲತ್ತಾಗಿ ಪರಿಣಮಿಸಬಹುದು. ಎಲ್ಲರಿಗೂ ಒಂದೇ ರೀತಿಯ ಕೋರ್ಸ್ ಎನ್ನುವ ಪರಿಕಲ್ಪನೆ ಹೋಗಿ ಪ್ರತಿಯೊಬ್ಬರಿಗೂ ಕಸ್ಟಮೈಸ್ಡ್ ಕಲಿಕೆ ಯೋಜನೆ ಅಗತ್ಯವಾಗುತ್ತಾ ಹೋಗುತ್ತದೆ.
• ನೌಕರರ ತೃಪ್ತಿ ಅಥವ ಇತ್ತೀಚಿಗೆ ನೌಕರ ನಿಶ್ಚಯ (Employee Engagement) ಬಗ್ಗೆ ಕೇಳಿದ್ದೇವೆಯಲ್ಲವೆ? ಇದು ಇದೇ ಪರಿಕಲ್ಪನೆಯಲ್ಲಿ ಉಳಿಯದೆ, ನೌಕರರು ತಮಗೆ ಯಾವ ರೀತಿಯ / ಬಗೆಯ ಅನುಭವ ಕಂಪನಿಯಲ್ಲಿ ಸಿಗಬಹುದೆನ್ನುವ ಪರಿಕಲ್ಪನೆ ಪ್ರಾರಂಭವಾಗುತ್ತದೆ (Employee Experience). ಅಲ್ಲದೆ, ಕಾಲಕಾಲಕ್ಕೆ ಪ್ರತಿಕ್ರಿಯೆಗಳನ್ನು ತಿಳಿಯುವ ಪದ್ದತಿ ಮಾಸಿ ಹೋಗಿ ನೈಜ ಸಮಯ ಹಿಮ್ಮಾಹಿತಿ (Real Time Feedback) ಅನಿವಾರ್ಯವಾಗುತ್ತಾ ಹೋಗುತ್ತದೆ.
• ನೌಕರರ ಪರಿಶ್ರಮ ಅಳತೆಯ ಅಥವ ದಕ್ಷತೆಯ ಮಾಪನದ ಬಗ್ಗೆ ಹೇಳುವುದಾದರೆ (Employee Performance Measurement), ಅವರ ಪರಿಶ್ರಮ ಅಳತೆಗೆ/ಮಾಪನಕ್ಕೆ ಬದಲಾಗಿ ಅಭಿವೃದ್ದಿ ಮತ್ತು ನಿರಂತರ ಹಿಮ್ಮಾಹಿತಿ/ಪ್ರತಿಕ್ರಿಯೆ ಅಸ್ತಿತ್ವಕ್ಕೆ ಬರುತ್ತದೆ. ಮೆರಿಟ್ಪೇ, ಪ್ರೊಮೋಷನ್ಗಳು ತಮ್ಮ ಇಂದಿನ ಸ್ವರೂಪವನ್ನು ಕಳೆದುಕೊಳ್ಳಬಹುದು.
• ಕಂಪನಿಯ ಬಗೆಗಿನ ನೌಕರರ ಅನಿಸಿಕೆಗಳು, ಅವರು ನೀಡುವ ಪ್ರತಿಕ್ರಿಯೆಗಳು ಕಂಪನಿಯ ಗೌರವವನ್ನು ನಿರ್ಧರಿಸುತ್ತವೆ. ಸಾಮಾಜಿಕ ಜಾಲತಾಣಗಳಲ್ಲಿ ನೌಕರನೊಬ್ಬನು ಅಪ್ಲೋಡ್ ಮಾಡಿದ ನಕಾರಾತ್ಮಕ ಪ್ರತಿಕ್ರಿಯೆ ಕಂಪನಿಯ ಗೌರವದ ಮೇಲೆ ಗಂಭೀರ ಪರಿಣಾಮ ಬೀರಬಲ್ಲದು.
• ಮಾನವ ಸಂಪನ್ಮೂಲ ವಿಶ್ಲೇಷಣೆಯ (HR Analytics) ಬಳಕೆ ಹೆಚ್ಚಾಗುತ್ತಾ ಹೋಗುತ್ತದೆ. ನಿರ್ಧಾರಗಳನ್ನು ಇದರ ಫಲಿತಾಂಶಗಳ ಆಧಾರದ ಮೇಲೆ ತೆಗೆದುಕೊಳ್ಳಬೇಕಾಗುತ್ತದೆ.
• ಹೆಚ್ಆರ್‍ ನ ಇತರ ಕೆಲಸಗಳಾದ ಕೆಲಸದ ಅವಧಿಯ ಮಾಪನ, ಆಡಳಿತ ಚಟುವಟಿಕೆಗಳು ಇವೆಲ್ಲ ತಾಂತ್ರಿಕತೆಯನ್ನು ಅವಲಂಬಿಸಿದ ಚಟುವಟಿಕೆಗಳಾಗುತ್ತಾ ಹೋಗುತ್ತವೆ.
• ಇನ್ನು ನೌಕರರ ಸಂಬಂಧಗಳ ಬಗ್ಗೆ ಹೇಳುವುದಾದರೆ, ಈ ಪ್ರಕ್ರಿಯೆ ಮತ್ತಷ್ಟು ಸಂಕೀರ್ಣವಾಗಿ ಈ ವಿಚಾರದಲ್ಲಿ ಮೀಡಿಯ, ಸ್ಥಳೀಯ ಸಮುದಾಯಗಳ ಪಾತ್ರ ಮತ್ತು ಪ್ರಭಾವ ಹೆಚ್ಚಾಗುತ್ತಾ ಹೋಗಬಹುದು.

ಈ ಮೇಲಿನ ಎಲ್ಲ ಅಂಶಗಳು ಮುಂದಿನ ದಿನಗಳಲ್ಲಿ ಹೆಚ್ಆರ್ ಕ್ಷೇತ್ರದ ಸ್ವರೂಪವನ್ನು ನಿರ್ಧರಿಸುತ್ತವೆ. ಹಾಗಾದರೆ ಇವುಗಳನ್ನು ನಿರ್ವಹಿಸಲು ಮಾನವ ಸಂಪನ್ಮೂಲ ವೃತ್ತಿನಿರತರಿಗೆ ಸಾಮಾನ್ಯವಾಗಿ ಬೇಕಾಗಬಹುದಾದ ಕೌಶಲ್ಯಗಳ ಜೊತೆಗೆ, ಈ ಕೆಳಗಿನ ಕೌಶಲ್ಯಗಳು ಅಗತ್ಯವಾಗಬಹುದು.

• ಮೊದಲನೆಯದಾಗಿ ತಮ್ಮ ಸುತ್ತಮುತ್ತ ಆಗುತ್ತಿರುವ ಬದಲಾವಣೆಗಳ ಬಗ್ಗೆ ಸೂಕ್ಷ್ಮ ಅರಿವು ಅಗತ್ಯ. ಅಗತ್ಯಬಿದ್ದಲ್ಲಿ ಹೆಚ್ಚಿನ ತಿಳುವಳಿಕೆ ಅಗತ್ಯ.
• ಸಾಮಾಜಿಕ ಸೂಕ್ಷ್ಮತೆ (Social Sensing) ಯ ಕೌಶಲ್ಯ ಮಾನವ ಸಂಪನ್ಮೂಲ ವೃತ್ತಿನಿರತರಿಗೆ ಅಗತ್ಯವಾಗಿ ಇರಬೇಕಾದ ಕೌಶಲ್ಯವಾಗುತ್ತದೆ. ಏಕೆಂದರೆ, ಸಾಮಾಜಿಕ ಮಾಧ್ಯಮಗಳಾದ ಇನ್ಸ್ಟಾಗ್ರಾಂ, ಫೇಸ್ಬುಕ್, ಲಿಂಕ್ಡಿನ್, ಟ್ವಿಟ್ಟರ್ ಇತ್ಯಾದಿಗಳು ವ್ಯವಹಾರ ಮತ್ತು ಜನರ ಜೀವನದ ಅವಿಭಾಜ್ಯ ಅಂಗಗಳಾಗಿ ಬೆಳೆಯುತ್ತಾ ಹೋಗುತ್ತವೆ. ನೌಕರರು ಈ ವ್ಯವಸ್ಥೆಗಳಲ್ಲಿ ಏನೆಲ್ಲಾ ಹಂಚಿಕೊಳ್ಳುತ್ತಾರೆ ಮತ್ತು ಅವುಗಳಿಂದ ಕಂಪನಿಯ ವ್ಯವಹಾರ ಮತ್ತು ಗೌರವದ ಮೇಲೆ ಆಗುವ ಬದಲಾವಣೆಗಳನ್ನು ಅರಿತು ಕೆಲವೊಂದು ಮುಂಜಾಗ್ರತೆಯ ಕ್ರಮಗಳು ಅಗತ್ಯತೆಗೆ ಬರುತ್ತವೆ. ಸಾಮಾಜಿಕ ಮಾದ್ಯಮಗಳಲ್ಲಿ ತನ್ನ ನೌಕರರು ಹಂಚಿಕೊಳ್ಳುವ ಮಾಹಿತಿಗಳು, ಪ್ರತಿಕ್ರಿಯೆಗಳು ಇವುಗಳ ಮೇಲೆ ನಿರಂತರವಾಗಿ ನಿಗಾ ಇಟ್ಟು ಅವುಗಳನ್ನು ವಿಶ್ಲೇಷಿಸಿ, ಅಗತ್ಯಬಿದ್ದಲ್ಲಿ ಅದರ ಮೇಲೆ ಕೆಲವೊಂದು ಕ್ರಮಗಳನ್ನು ಕೈಗೊಂಡು, ನೌಕರರಿಗೆ ಬುದ್ಧಿವಾದ ಹೇಳುವ ಪ್ರಕ್ರಿಯೆಯನ್ನು ಸೋಶಿಯಲ್ ಸೆನ್ಸಿಂಗ್ ಎನ್ನಬಹುದು.
• ತಾಂತ್ರಿಕತೆಯ ಬಳಕೆ ಹೆಚ್ಚಾಗುವುದರಿಂದ, ಈ ವಿಚಾರದಲ್ಲಿ ಹಿಂದುಳಿದವರಿಗೆ ಹೆಚ್ಆರ್ ಕ್ಷೇತ್ರದಲ್ಲಿ ಸ್ಥಳವೇ ಇಲ್ಲದಂತಾಗುತ್ತದೆ. ಹಾಗಾಗಿ, ಅಗತ್ಯವಿರುವ ತಾಂತ್ರಿಕತೆಯ ಕಲಿಕೆ ಅನಿವಾರ್ಯವಾಗುತ್ತದೆ.
• ಎಲ್ಲಕ್ಕಿಂತ ಮುಖ್ಯವಾಗಿ ವ್ಯವಹಾರದಲ್ಲಿ ಆಗುತ್ತಿರುವ ಬದಲಾವಣೆಗಳ ತಿಳುವಳಿಕೆ, ತನ್ನ ಕಂಪನಿಯ ವ್ಯವಹಾರದ ಮೇಲೆ ಆಗಬಹುದಾದ ಬದಲಾವಣೆಗಳು ಮತ್ತು ವ್ಯವಹಾರದ ಬಗ್ಗೆ ಸಾಕಷ್ಟು ಜ್ಞಾನ ಅಗತ್ಯ.
• ಮಾನವ ಸಂಪನ್ಮೂಲ ವಿಶ್ಲೇಷಣೆ (HR Analytics) ಮತ್ತು ಅದರ ಉಪಯೋಗ, ಈ ನಿಟ್ಟಿನ ಕೌಶಲ್ಯ ಅಗತ್ಯವಾಗುತ್ತದೆ.
• ಕಲಿಕೆ, ಅಕಲಿಕೆ/ಮರೆಯುವುದು ಮತ್ತು ಮರುಕಲಿಕೆಯ ವೇಗದ ತೀವ್ರತೆಯನ್ನು ಹೆಚ್ಚಿಸಿಕೊಳ್ಳಬೇಕಾಗುತ್ತದೆ. ಅದೂ ಅಲ್ಲದೆ ಕಲಿಕಾ ಹುಮ್ಮಸ್ಸನ್ನು (Lerning Agility) ರೂಢಿಸಿಕೊಳ್ಳಬೇಕಾಗುತ್ತದೆ.
• ಹೊಸತನ ಮತ್ತು ಮುನ್ನುಗ್ಗುವ (Creativity and Risk Taking) ಸಾಮರ್ಥ್ಯವನ್ನು ಬೆಳೆಸಿಕೊಳ್ಳಬೇಕಾಗುತ್ತದೆ.
• ಮಾನವ ಸಂಪನ್ಮೂಲ ಕ್ಷೇತ್ರದಲ್ಲಿ ಕಥೆ ಹೇಳುವ ಮೂಲಕ ಅಭಿಪ್ರಾಯ ಬದಲಾವಣೆ, ಕಲಿಕೆ ಇವೆಲ್ಲ ಇತ್ತೀಚಿನ ಬೆಳವಣಿಗೆಗಳು (Story Telling in HR). ಈ ಕೌಶಲ್ಯಗಳನ್ನು ರೂಢಿಸಿಕೊಂಡು ಬೆಳೆಸಿಕೊಳ್ಳುವುದು ಅತ್ಯಗತ್ಯ.
• ಹೆಚ್ಆರ್ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಈಗಾಗಲೇ ತಾಂತ್ರಿಕ ಪ್ಲಾಟ್ ಫಾರಂಗಳು ಸಾಕಷ್ಟಿವೆ. ಉದಾಹರಣೆಗೆ, ವರ್ಕ್ಡೆ, ಬಂಬೂ ಹೆಚ್ಆರ್, ಅಲ್ಟಿಪ್ರೋಹೀಗೆ ಹಲವು ಪ್ಲಾಟ್ ಫಾರಂಗಳು ಇವೆ. ಅವುಗಳ ಜ್ಞಾನ ಮತ್ತು ಮಾಹಿತಿಗಳು ಅವಶ್ಯಕ.
• ವ್ಯವಹಾರ ಮತ್ತು ಜನಾಂಗ ಪೀಳಿಗೆಗಳು ಬದಲಾದಂತೆ ದೇಶದ ಕಾನೂನು ಸಹ ದಿನೇ ದಿನೇ ಬದಲಾಗುತ್ತಿರುತ್ತದೆ. ಈ ಹೊಸ ನಿಯಮಗಳು ಮತ್ತು ಬದಲಾವಣೆಗಳನ್ನು ತಿಳಿದುಕೊಂಡು ಅವುಗಳ ಅನ್ವಯ ಮತ್ತು ಅಳವಡಿಕೆಗಳನ್ನು ಮಾಡಿಕೊಳ್ಳಬೇಕಾಗುತ್ತದೆ.

ತಾಂತ್ರಿಕ ಹೊಸತನ ಮತ್ತು ಉನ್ನತಿಗಳು ಮಾನವ ಸಂಪನ್ಮೂಲ ವೃತ್ತಿಪರರಿಗೆ ಕೆಲಸವಿಲ್ಲದಂತೆ ಮಾಡುತ್ತದೆಯೇ ಎನ್ನುವುದು ಇನ್ನೊಂದು ಪ್ರಶ್ನೆ. ಆದರೆ ಹೀಗಾಗಲಾರದು. ಮಾನವ ಸಂಪನ್ಮೂಲ ವೃತ್ತಿ ಸಂಕೀರ್ಣತೆಯತ್ತ ತೆರಳಬಹುದೇ ಹೊರತು ವ್ಯವಸ್ಥೆಯಿಂದ ಕಿತ್ತೊಗೆಯಲು ಸಾಧ್ಯವಾಗದು. ಏಕೆಂದರೆ ಎಲ್ಲಿಯವರೆಗೆ ನೌಕರರ ನಿರ್ವಹಣೆ ಅಗತ್ಯವೋ ಅಲ್ಲಿಯವರೆಗೆ ಈ ಕ್ಷೇತ್ರದ ಮಹತ್ವ ಹೆಚ್ಚಾಗುತ್ತಾ ಹೋಗುತ್ತದೆ. ತಾಂತ್ರಿಕತೆಯ ಬದಲಾವಣೆಗಳು ಮತ್ತು ಉನ್ನತಿ ಈ ಕ್ಷೇತ್ರಕ್ಕೆ ಪೂರಕವೇ ಹೊರತು ಮಾರಕವಂತೂ ಆಗಲಾರದು.
 
ಉಲ್ಲೇಖಗಳು:

1. ದೂರದೃಷ್ಟಿ ಮತ್ತು ದೂರಾಲೋಚನೆ.
2. ವಿವಿಧ ಸೆಮಿನಾರ್ ಗಳಲ್ಲಿ ಈ ವಿಚಾರದ ಮೇಲೆ ಕೇಳಿದ ಭಾಷಣಗಳು.
3. ಗೂಗಲ್ ದೇವರಪ್ಲ್ಯಾಟ್ ಫಾರಂನಲ್ಲಿ ಈ ವಿಚಾರಗಳ ಮೇಲೆ ಲಭ್ಯವಿರುವ ಅಪಾರ ಮಾಹಿತಿಗಳು.

 
ಲೇಖಕರ ಘೋಷಣೆ:
ಈ ಲೇಖನವನ್ನು ನನ್ನ ಅನುಭವ, ದೂರದೃಷ್ಟಿ, ಜ್ಞಾನ ಮತ್ತು ಪ್ರಚಲಿತ ವಿಧ್ಯಮಾನಗಳನ್ನು ಆಧರಿಸಿ ಸಿದ್ದಪಡಿಸಲಾಗಿದೆ. ವಿಚಾರಗಳನ್ನು ಕಲೆ ಹಾಕುವಾಗ, ಈ ವಿಚಾರದಲ್ಲಿ ಲಭ್ಯವಿರುವ ಲೇಖನಗಳು ಮತ್ತು ಮಾಹಿತಿಗಳನ್ನು ಅಧ್ಯಯನ ಮಾಡಿ ಸಿದ್ದಪಡಿಸಲಾಗಿದೆ.